ZERUBABELA LEH EZRA-TE HUN LÂI CHANCHIN l1

Share with:
  •  
  •  
  •  
  •  
  •  
  •  
  •  
  •  
  •  

ZIRLÂI 1 *September 28–October 4

 ZERUBABELA LEH EZRA-TE HUN LÂI CHANCHIN

 SABBATH CHAWHNÛ September 28 
 CHHIAR TÛRTE: Jer. 25:11, 12; Dan. 9:1, 2; Ezra 4:1–7; Isa. 55:8, 9; Ezra 7:1–28.
 CHÂNGVAWN: “Chutichuan, Persia lal Kura chuan heti hian a sawi a: ‘Lei chunga lalram zawng zawng hi LALPA vân Pathian chuan min pe tawh a. Tin, Judai ram Jerusalema ama tâna in sa tûrin thu min pe bawk a ni’ tiin” (Ezra 1:2, NKJV).
 JEREMIA lehkhabu-ah khân Pathianin a mite chu Babulon sala kum 70 an tân hnu-ah an rama an kîr leh tûr thu a hrilh tih kan hmu a. Hetianga an kîr leh theihna tûr hian Lal Kura kha Pathian hmanrua-ah a tang dâwn a ni. Amah kha Pathian hriak thih a ni a (Isa. 45:1), tichuan, B.C. 538 vêl khân thupêk chhuahin, Pathian mite chu an rama an kîr a, tempul chhe tawh chu an din thar leh a phalsak ta a ni.
 Jerusalem chungchâng thua, “Din thar leh ni rawh se” tih leh, tempul chungchâng thua, “A lungphûmte chu rem that leh ni rawh se” tih sawitu chu Kura ni lovin, Pathian zâwk a ni tih hria ila (Isa. 44:28, NIV). Chutiang chuan, Jerusalem khawpui din thar leh a nih tûr thu sawitu chu Pathian a ni a, tin, tempul sak that leh a nih theihna tûra phalna pe tûrin Kura thinlungah khân hna a rawn thawk bawk a ni.
 Pathian miten tha taka LALPA rawn chêtna an lo chhâng lêt han hmuh hian rilru a lâwm thîn a: “Chutichuan, Juda hnam leh Benjamina hnam puipate, puithiamte leh Levia-hote—Pathianin an thinlung a chawh thawh zawng zawngte chu—Jerusalema LALPA in sa tûrin an thawk chhuak ta a ni” (Ezra 1:5, NIV).
 Hetah hian Israel miten Pathian khawngaihna thiltih ropui takte chu tha taka an lo dawnsawn thu kan hmu a. Kan thil tih apiang tha taka hlenchhuak thei tûr chuan Pathian hi tu nge a nih tih leh eng thil nge a lo tih tawh tih te kan hriat a tûl thîn a; tin, a mite a hmangaih avânga an tâna a rawn chêt thin dân pawh kan hriat tel ve a ngâi bawk.
 *Tûn kâr zirlâi hi Sabbath nî-a sawi ho thei tûrin lo zir ang che.

 SUNDAY September 29

 SÂLTÂNG KÎR LEH TUM KHATNA

 Jeremia 25:11, 12 leh 29:10 leh Daniela 9:1, 2 chhiar la. Eng tikah nge saltâng kîr leh hmasa berte khân Jerusalem an thlen? Khami tuma kîr lehte khân eng hrilhlâwkna nge an thlen famkimtîr?
 Jeremia lo hrilhlâwk anga Israel fate Jerusalema an kîr leh phalsak tûrin LALPA chuan Kura thinlungah hna a rawn thawk ta a. Jeremia khân Judai ram chu Babulon hnuaiah kum 70 chhûng tihtiauin a awm ang a (hei hi B.C. 606/605 atanga B.C 537/536 khân a thleng a), chumi hnu-ah chuan Pathianin sâltângte kîr leh theih nân kawng a hawng dâwn niin a lo sawi a. Daniela khân Jeremia lo sawi hi ngun takin a zir a, tichuan, an kîr leh hun tûra a sawi chu a lo thleng ta a ni tih a hria a ni.
 Daniela bung 9-ah chuan kum 70 a râl têp tawh tihah pawh eng mah thil thleng lian tham a la awm loh avâng leh lalram thar, Persia Lalram a lo din leh tâk bawk si avânga Daniela rilru a buai hle thu kan hmu a. Tap chungin Pathian hnênah a tawngtâi a, a hnamte chungah khawngaihna lantîr a, a thutiamte chu tihhlawhtling ngei tûrin a ngên ta a ni. Bung 9-ah tho hian (Dan. 9:24–27) Pathian chuan thil engkim a lo thlîr reng a, ruahmanna fel tak neiin, Chhanchhuaktua (Hriakthiha) chu a mite sual tlan nân a thî ang a, felna tun din leh niin chutih hunah chuan hâlral thilhlanten an lo entîr chu a thlen famkim tawh tûr thu Daniela a hrilh tih kan hmu bawk. Pathian chuan, “Daniel, pawi ti mah ta che. Chhanchhuaktu dik tak (Isua Krista) chu a lo kal ngei dâwn a; tin, tûnah pawh hian nangmahni chhanchhuaktu tûr ka rawn tîr tho bawk dâwn asin” tiin a hrilh ta a ni. Hemi hnu deuh lawkah hian Pathian chuan Persia lal, Kura thinlungah hna rawn thawkin Kura chuan saltângte chhuahna thupêk a chhuah ta a. Pathian chu a thutiamte-ah a rinawm thîn rêng si a (Anmahni rama a mite hmuingîl taka an awm theihna tûra Pathian rawn inrawlh dân i hriat theih nân Daniela bung 10 chhiar ang che.)
 Ezra bung 1-ah hian Lal Kuran Israel hnam chu Jerusalema an kîr a, LALPA in an sak that leh a phalsak thu kan hmu a. He thupêk hi B.C. 539 leh 537 inkâr vêla chhuah a ni. Kura hian a kîrtîr a ni mai lo va, thilpêk leh tanpuina sum tam tak bâkah, Nebukadnezzaran tempul atanga a lâk chhuah bungbêl thianghlimte pawh kha a hawntîr leh vek bawk. Hemi tuma kîr lehte hi mi 50,000 vêl an ni a, an zîngah hian hmeichhiate leh naupangte pawh eng emaw zât an tel ve ngeiin a rinawm.
 Pathian Lehkha Thu-a hrilhlâwkna dang engte hi nge hrilhlâwk a nih dân ang takin lo thleng ve le? Hêngte atang hian eng tin nge Pathian chuan thil lo thleng tûrte hi a hre lâwk vek a, a thutiamte pawh rin ngam a nihzia hriain thlammuanna kan lo neih theih ang?

 THAWHTANNI September 30

 LALTE LEH THIL THLENGTE THLÎRNA

 Saltâng kîr leh tum khatnaa telte hnathawh ber tûr chu Pathian tempul tluchhe tawh sak that leh a ni a. Tempul sak that hna an thawh lâia dodâlna an tawh dân chu zirlâi dangah kan sawi dawn a. Tûnah rih chuan, tempul sak that hna leh Jerusalem din thar leh hna thawh a nih chhûnga Persia lal rawn nihote chanchin kan sawi phawt ang. A chhan pawh, Ezra leh Nehemia lehkhabuten an sawi phêna thil thlengte hian an thuchah awmzia hrethiam thei tûra min puih tlat avângin hriat tel ve ngei a tûl atin ni.
 Ezra 4:1–7 chhiar la. Tempul sak hna thawhin dodâlna a tawh lâia Persia lalthutthleng luahtu a sawi lante chu tute nge ni?
 Hêng a hnuaia mite hi Persia lal, Ezra leh Nehemia lehkhabua thil thleng kan hmuhte nêna inzawmna nei an ni a. A hmasa ber chu Kura niin, ani hi Persia Lalram dintu leh B.C. 539-a Babulon hnehtu kha a ni. Lal dangte chu an lal hmasak dân indawtin hetiang hi a ni e:
 1. Kura II (B.C.559–530)
 2. Cambyses II (B.C. 530–522)
 3. Daria I (B.C. 522–486)
 4. Zerzia I (B.C. 485–465) (Estheri lehkkhabu-ah chuan Ahasuera tia sawi a ni.)
 5. Artazerzia I (B.C. 465–424)
 Hêng lalte hi Ezra lehkhabu-ah hi chuan an lal hmasak dân indawta ziah lan a ni hran lo tih hriat a pawimawh khawp mai. Entîr nân, Ezra 4:6–24 pawh hi bung 5, tempul sak hnain dodâlna a tawh dân chanchin sawi chhunzawmna hmâa dah a ni teh tlat a. Chutiang bawkin, Ezra bung 4-a kan hmuh Zerzia I (Ahasuera) leh Artazerzia I te lehkhathawn pawh hi Daria I chanchin sawina, bung 5 leh bung 6-a thilthleng a sawite hmâa thleng a ni. Hetianga inluh thelh deuh nuaia ziah a nih avâng hian a chhiartute tân pawh hriatthiam a har phahna chin a awm thei a, mi thiamte zîngah ngei pawh ngaihdân a rual bîk chuang lo. Kan zir chho zêl ang a, hêng thilthlengte hi a thlen dân indawt kan hria a nih chuan Ezra leh Nehemia lehkhabutea thuchah awmte hi a awmzia kan hrethiam tha leh zual thei dâwn a ni.
 Bible-in a sawi engte hian nge i rilru tibuai thîn? I hriatthiam theih miah loh thil i hmuh chângte pawh hian eng tin nge Pathian leh a Thu chu rin tlat dân i zir chhuah theih ang? Chutianga tih chu eng vângin nge i tân a pawimawh viau le? (Isa. 55:8, 9 en la.)

 THAWHLEHNI October 1

 SALTÂNG KÎR LEH TUM HNIHNA

 Ezra 7:1–10 leh 8:1–14-ah hian Lal Artazerzia I-an Jerusalema Ezra kal leh ruala kal ve duh apiangte chu kal a phalsak thu kan hmu a (hemi kum hi B.C. 457 a ni). Artazerzia leh Ezra inlaichîn dân hi eng ang chiah nge kan hre lo va, Ezra hi lal ina thawk pawh a ni mai thei. Ezra bung 8 hian Jerusalema kîr leh chhûngkaw puipate leh an thlahte hming sawiin, puithiam thlahte a sawi hmasa ber a, chu chu lal chhûngkaw thlahten zuiin, mipui nâwlpui thlahte hmingin a khâr a. Chhûngkaw sâwm leh pahnih hming a sawi lang kher hi Israel hnam sâwm leh hnam hnihte entîrna atân a ti a nih a rinawm. Mihring a sawi lan zât hi 1,500 vêl niin, an nupui fanaute nêna belhkhâwm chuan 5,000 atang 6,000 emaw lâi an tling ang a. Mahse, a hmâa Zerubabela leh Josua hova lo va kîr hmasate âi kha chuan an tlêm zâwk hle tho a ni.
 Ezra 7:1–10 chhiar la. Hei hian Ezra chungchâng eng nge min hrilh?
 Ezra hi puithiam thlah zînga mi, lehkhaziaktu a ni a. Mosia unaupa, Israel hnam puithiam hmasa ber ni bawk Arona thlah kal zêla mi a ni. A lehkhabua ama chanchin a ziah dân avâng leh, hmânlâi ata tawh an lo ngaihsân êm thin bawk avângin tûnlâi pawh hian ngaihsân a la hlawh hle. Lal Artazerzia inah khân lehkhaziaktu angin a awm nge tih hriat a ni lo va; chuvâng chuan, lehkhaziaktu ni anga sawi a ni pawh hi a hmâa a lo nih thin vâng emaw, a nih loh paw’n Judai ram a thlen hnu-ah lehkhaziaktu anga hna a thawh tâk vâng emaw pawh a ni zâwk mai thei. Chutih rual chuan, Judai rama kîr tûrte hotu ber atâna ruat a nih dânah Artazerzia tân khân hnâi takin hna a lo thawk tawh thîn a ni ngei ang tih erawh a chiang hle thung.
 Ezra 7:6 leh 10-ahte hian Ezra chu lehkhaziaktu emaw, dân zirtîrtu emaw ‘thiam tak’ leh ‘thahnemngâi tak’ nia sawi a ni a. ‘Thiam tak’ tih hi a ngial a ngana sawi dâwn chuan ‘rang’ tihna niin, thil eng emaw hriatthiam kawnga rilru chak tak nei sawi nân hman thin a ni. Ezra kha a rilru a chak hle a—Pathian dân hriatna leh a hman dân thiam kawnga hnam pum hriat hlawh ni phâk a ni. Chu mai pawh chu ni lovin, Judai rama kîr tumte hruaitu atâna lalin a thlang nalh pawh hian Ezra huaisenzia leh hruaitu tha a nihzia a tilang chiang hle bawk.
 Ezra khân ‘LALPA dân’ hriaa zâwm tûrin a thinlung a buatsaih tlat a (Ezra 7:10). Eng tin nge keini pawh hian a tih ang chu keimahni nun ngeiah hian kan tih ve theih ang?

 NILÂINI October 2

 ARTAZERZIA THUPÊK

 Ezra 7:11–28 chhiar la. Lal thupêkin a huamte chu eng nge ni? Eng vângin nge hêng thute hi Israel mite tân khân a pawimawh viau le?
 Artazerzia thupêk hian a hmâa Kura thupêk lo chhuah tawh kha a ang hle a. Thupêk a chhuah hmâ hian Jerusalema kîr duhho, a bîkin puithiam hnam zînga mite chu thurâwn a pe vek phawt a ni. Murashu Archive-a thuziak hlui (cuneiform tablets) an vawn that chuan Judate zînga a tam zâwk daihte kha Persia ramah an inbêngbel hlen ta niin a sawi a (chutiang chu Estheri lehkhabu-ah pawh kan hmuh dân a ni rêng a ni), chutih rual chuan, an thlahtute pianna rama nun thar tan lehna remchâng tha inher chhuah hun lo thlîr ngar ngartu pawh eng emaw zât an awm ve tho bawk. Lal hian Eufratis lui râla awm Persia lalram sum enkawltu zawng zawngte chu lehkha lo va thawn vekin Ezra chu khawpui din thar lehna tûr atân leh LALPA in tihmâwina tûr atâna a mamawh apiangte lo pe zêl tûrin thu a pe a (Ezra 7:27). Pathian dân leh ram dânte tha taka zawm a nih theih nân Ezra kutah thuneihna a hlân bawk. He a thupêkin a ken tel dân leh dûnte hi eng khawtlâng tân pawha thil pawimawh tak a ni ve hrim hrim a. Chu bâkah, hêngte avâng hian Ezra leh Israel mite khân anmahni ram din thar leh hna awlsam zâwkin an thawh theih phah bawk a ni.
 Hetianga lalin Jerusalem khawpui leh tempul sak that hna a vei êm êm mai hian Ezra Pathian ringtu a lo ni ve ta tih a tilang tihna a ni em? Artazerzia hian Pathian chu “Jerusalema awm Israel-te Pathian” (Ezra 7:15) tiin a sawi a. Israel-te Pathian sawina atâna tawngkam a hman hian LALPA (Jehova) chu khawpui pakhat enkawltu pathian, thilthlâwnpêkte hmanga tlawn lungâwi ngâi ang chi ni veah a ngâi tih a tilang a. He khaw pakhat bil pathian hi amah leh a fate laka thinur tûrin a duh lo a ni ngei ang (Ezra 7:23). Tin, B.C. 457 hi Persia sawrkâr laka Aigupta ram an hel kum a ni tih hre tel bawk ila; chuvâng chuan, hetianga rilru inhawng taka thil a ti hi Judai rama chêngte rilru hneh a duh vâng a nih ngei a rinawm bawk.
 Thil vânduaithlâk deuh mai erawh chu, Ezra leh Nehemia te nêna thil an ti ho tam hle chunga Pathian ringtu a ni ve ta chuang miah lo mai kha a ni. Ezra leh Nehemia lehkhabu-ahte hian sawi lan ni chiah lo mah se, LALPA chuan leia a thiltumte hlenchhuak tûrin mi piangthar lote pawh a hmang thei tho tih erawh kan hre thei.
 Heta kan hmuh ang hian harsatna leh hrehawm nasa tak kârah pawh eng tin nge Pathian chu khawvêl zawng zawng chunga thuneitu a ni tih hi rin ngam dân kan thiam theih ang?

 NINGANI October 3

 INZIRTÎRNA PAWIMAWHZIA

 Ezra 7:6 leh 10 chhiar la. Hêng châng pahnihte hian sakhaw lama inzirtîrna mumal tak neih a pawimawhzia eng tin nge min hrilh?
 Ezra khân a thinlung zawng zawngin Pathian rawng a bâwl a, Pathian Thu zirin mi dangte pawh a zirtîr ve leh chhâwn thin bâkah ama’n a takin a nunpui bawk a (Ezra 7:6, 10), chu chuan Israel rama rawngbâwlna ropui zâwk nei thei tûrin a buatsaih reng a lo ni. Bible-a a inziah dân takah phei chuan, Ezra khân LALPA dân chu zir a, zâwm a, mi dangte pawh zirtîr ve tûrin a rilru nghet takin a siam a ni.
 Ellen G. White-i chuan heti hian a lo ziak a: “Ezra kha Arona thlahte zînga mi niin puithiam hna thawk tûra chher a ni a, tin, mitdâwivaih lam te, âien thil te leh MedoPersia rama mi fingte thuziakte pawh hre ve thawkhat tak a ni bawk. Mahse, a thlarau nun chu a duhkhawp lo hle mai si a. Pathian nêna inrem thlapa awm a châk êm êm a, Pathian duhzâwng ang chu a hlenchhuah theih nân finna neih a duh hle bawk. Chutichuan, ‘LALPA dân chu hriaa zâwm tûrin a thinlung a buatsaih ta a ni’ (Ezra 7:10). Chu chuan Pathian mite chanchin, zâwlneite leh lalten an lo ziahte chu ngun taka zir châkna thinlung a neihtîr a. Bible-a chinchin ziahna lehkhabute leh hla chham mi ziahna lehkhabute chu dap khâwmin, Pathianin Jerusalem tichhiat a phal chhan leh milem be mite rama a mite sala hruai an nih a phal chhante chu hriat chhuah tumin a chhiar thîn a ni.”— Prophets and Kings (Zâwlneite leh Lalte), pp. 513, 514.
 “Miten Pathian Lehkha Thu zir châkna an lo neih thar leh theihna tûra Ezra hnahthawhte hi amah ngeiin theihtâwp chhuaha Thuziak Thianghlimte a vawn thata, a ziah chhâwn thin bawk avângin ngaihsak a hlawh a, a daih rei hle nghe nghe. Dân bu a hmuh theih ang zawng zawng chu a la khâwm vek a, chûngte chu copy tam tak siamin a sem darh bawk. Chutiang thu thianghlim leh fîr, copy tam tak siama mite hnêna an pêk chuan a hlutzia teh sên rual loh khawpa sâng hriatna a neihtîr ta a ni.”—Phêk 515.
 Ezra khân milem be mite thiam thilte chu zir ve vek tho mah se, a dik lo a ni tih erawh a hria a; chuvângin, thutak chu thutak lo chhuahna hnâr, Pathian Thu atang leh ‘LALPA dân’ atanga hriat a tum ta rêng a ni. Khawvêl thiam zirna in sângte atanga a thil lo zir tawhte chu thlauhthlâk leh tuma a beih leh a ngâi a, a chhan pawh chûng hmuna an thil zirte chu dik lo tam tak a awm vâng a ni. A thuhrimin, ‘mitdâwivaih thiamte’ leh ‘âien thiamte’ thuziahte chuan eng thil tha nge an chhuahsâk rêng rêng ang le?
 Tûnlâi hunah pawh hian khawvêl hnên atanga kan thil zirte hi eng tiang kawngtein nge kan thlauthlâk ve a ngaih ang?

 ZIRTÂWPNI October 4

 Zir Belhna: Ellen G. White-i lehkhabu, Zâwlneite leh Lalte phêk 513–522-a ‘Ezra, Puithiam leh Ziaktu’ tih kha chhiar ni se.
 Ezra taimâkzia hi ngaihtuah teh: “Ezra chu Pathian âiawha thu sawitu a lo ni a, vânram inawpna dânte mil zêlin mite hnênah Pathian chungchâng thu a sawi thîn. Medo-Persia lal inah a ni emaw, Jerusalemah pawh ni se, a dam chhûng zawnga a thawh zui tâk ber chu zirtîr hna a ni a. Thutak a zir chhuahte mi dang hnêna a hrilh chhâwn ve zêl khân hlâwk zâwkin hna a thawh theih phah thîn a ni. Amah pawh lo sakhaw mi leh zual sauhin, thahnem a ngâi telh telh bawk a. Bible thutakin an ni tin nun a tihzahawm theihzia khawvêl hnêna hriattîr tûra LALPA mi tirh a ni.”—Ellen G. White, Prophets and Kings (Zâwlneite leh Lalte), pp. 514, 515.
 “Tûn huna siamthatna hna thawk tûr pawh hian Ezra leh Nehemia te ang mi nghet, sual en liam emaw, pawmzam emaw mai mai lo tûr leh Pathian zahawmna humhim tlat tum mi mamawh a ni a. He hna thawk tûra ruatte chuan miin thil dik lo an tih an hmuhin an ngâwi mai mai lo vang a, thil sual chu tanpuina lem kawrfualin an khuh bo bawk hek lo vang. Pathian chu mi duhsak bîk nei lo a ni tih leh, mi sual tlêm tê-te chunga a rorêlna khauh tak chu mi tam takte chunga zahngaihna a lantîrzia tilangtu a ni tih an hria ang a. Tin, sual zilhhautu nunah chuan Krista rilru lantîrin a awm tûr a ni tih pawh an hre bawk dâwn a ni.”—Phêk 573, 574.
 Sawi Ho Tûrte:
 1. LALPA hnên atang hian thutiam ropui tak tak kan dawng ngei alâwm. Chutih rualin, Pathian chuan mi a tilui ngâi miah lo thung a. Kan nunah hian Pathianin kan hnêna a tiamte a taka a lo thlenna tûr dâl thei duhthlanna eng engte nge kan siam thin le?
 2. Daniela 9:1–23-a Daniela tawngtâina thu hi chhiar ula. Hetah hian nangmahni pawhin in tih ve theih ang thil engte nge awm? A awmzia chu, Daniela hian eng nge a tih a, eng nge a rilru puthmang ni a, tin, eng thil nge a dîl? Hêng bâkah hian keini tûnlâi huna mite pawhin kan tih ve theih thil dang eng nge la awm bawk?
 3. Ningani zirlâiah khân Ezra rawngbâwlnaa Pathian Thu-in hmun pawimawh tak a chan thu leh, Pathian Thu a hriat ang chu miten an lo hriat ve theih nâna thahnemngâi taka a thawh thin thu Ellen G. Whitein a ziah chu kan chhiar a. Hetah hian keini tûnlâi mite nun leh kohhrana Pathian Thuin hmun pawimawh tak a chan a tûl thu chiang taka a sawi lan chu eng nge ni?